2023年新一輪消費券即將推出，領取消費券的方式有很多種，當中以八達通方式領取的相信最深受長者歡迎，貪其方便易用。不過，由去年年中起，政府推出樂悠咭，為年滿60歲人士提供長者優惠，同時可取代長者八達通。對兩咭在手的長者來說，又要使用八達通來領取消費券，實在會有點束手無策。

$2 長者交通津貼，對長者非常重要

桂蓮年屆68歲，獨居於上水彩園邨。丈夫早年先遊，育有一子一女，兩名子女已成家立室，各有家庭。她雖然已是退休年齡，但偶爾也會當兼職，到鰂魚涌寫字樓當清潔女工，一方面可打發時間，另方面可幫補生計。由上水到鰂魚涌的路程雖然遙遠，但因為她享有＄2 長者交通優惠，可助她在昂貴的交通費中，節省不少。但近日長者八達通、樂悠咭及新一輪消費券，令她感到非常煩惱。

長者長期外出，靠$2交通津貼，並使用八達通領取消費券

「我先生雖然早走過我，囝囡又大個喇唔喺身邊，自己又無乜積蓄，但我一個人生活都好開心，因為我宜家仲有精力可以周圍去，得閒可以去見吓朋友、返兼職同做義工，每個月靠長者生活津貼，慳慳地都夠生活。好彩政府有畀我哋老人家＄2 搭車優惠，宜家啲車費咁費，如果叫我畀原價，我真係邊度都唔去啊！所以我平時都會袋好我張八達通，去邊都係『嘟』，夠晒方便，我上一次拎消費券都係用佢。

樂悠咭即將取代長者八達通，但領取消費券怎麼辦？

‍

之前聽兼職同事講，政府要改用樂悠咭，話我哋用緊長者八達通嘅長者就要申請，如果唔係就無長者優惠。知道之後我好驚，因為＄2搭車對我嚟講真係好重要，於是打搞咗個同事好耐，問長問短，先至識得申請樂悠咭。直到近排另一個惡夢又開始，就係個消費券。初頭聽到派消費券好開心，有多少少錢駛，但當知道照用返上次方法去拎$5,000，我就頭痕喇！因為之前換樂悠咭，我擺埋咗張八達通，好耐無用唔知仲有冇效，同埋可唔可以直接用樂悠咭拎$5,000呢？我聽街坊講有啲話得，有啲又話唔得，想問吓要唔要再申請定要點做，又無人答到我，我好無助。費事返工麻煩兼職同事，啲囝囡又唔係成日見，況且佢哋都好忙，唔敢搵佢哋。為呢件事我都憂心咗一排，唔知問邊個好。

幸得舜禹義工隊幫忙講解，桂蓮可安心領取消費券

好彩有舜禹義工隊幫我，佢哋之前咁啱嚟家訪，問我近排有咩需要，我即刻唔怕醜問佢哋，我到底可以點樣拎到消費券？原來以我呢個案例，拎咗樂悠咭，而張舊嘅八達通仲喺度，最好就係保留舊有八達通，直到下個月要拎消費券時，用返舊八達通拎消費券，咁就最萬無一失喇，雖然舊嗰張好耐無用，但原來都仲有效。不過兩張咭成日拎出拎入，我好驚整唔見，佢哋啲後生仔好好啊，仲教我之後點樣將兩張咭合體！佢哋話拎完消費券之後，可以去指定嘅港鐵站或者商場入面嘅「八達通服務站」做「易轉服務」，將現有八達通内嘅服務、價值或優惠轉移至樂悠咭，仲話「八達通服務站」好似部提款機咁，白色嘅，好易就搵到。

港鐵站設有「八達通服務大使」，解答問題

‍

雖然佢哋都好細心，慢慢講解我知，不過我幾廿歲記性唔好，驚唔記得佢哋講嘅嘢。佢哋話唔駛擔心，八達通公司喺荃灣、佐敦、屯門、藍田、柴灣、天水圍、上水、坑口、油塘、美孚、石硤尾同粉嶺嘅港鐵站，每日朝早8點至下晝5點都有「八達通服務大使」幫我解決問題，同埋最重要係佢哋留低咗電話畀我，叫我有咩需要都可以打畀佢哋，我即刻放下心頭大石！宜家咩嘢都話要上網搞，我哋呢啲幾廿歲鬼識咩，有佢哋幫手，我個心定晒，多謝舜禹義工班後生仔！」

舜禹學堂樂意解答老友記的生活難題，做老友記的最強後盾

當八達通加上樂悠咭，再遇上消費券，確實會令老友記感到疑惑或無助。除了這次消費券措施，事實上在現今資訊發達，網絡年代的社會，很多時老友記也未必跟得上節奏。舜禹學堂明白老友記的需要，如果你身邊有老友記或你有需要，都好歡迎隨時找我們幫忙，可以致電給我們，或者留言也可以。舜禹學堂樂意做老友記的最強後盾！

歡迎你在辦公時間星期一至五9:00-13:00及14:00-18:00致電34138790或WhatsApp：5548 5238直接與我們聯絡。

_{相關資料：}

_{長者樂悠咭}